Tessinzu in Sardigna

Su volume“TESSÌNZU in SARDIGNA” naschet cun s’obietivu de preservare sa memòria tèssile de Sardigna, in unu caminu chi abbàidat a su passadu e a sa traditzione ma contribuit a sa connoschèntzia e a su rinnovamentu de unu setore artesanale galu produtivu meda. Su volume contat pro immàgines s’arte de su tessìngiu, cunsiderada una de sas formas de artesania prus rapresentativas de su patrimòniu culturale de Sardigna e chi galu oe est tenta a contivìgiu e tenet una difusione cummertziale.

Telàrgiu e càssias. Cannugra e fusu. Lana, linu e cotone. In ie, in ue sa Natura no est mala a dare matèrias primas e colores, sas fèminas de Sardigna si pesant a bolare in su telàrgiu de su tempus e intessent una trama ammajadore, paristòria aneddòtica e simbòlica. Cun frores e bide, su cherbu e s’angione, s’àbbile, su leone. Sole e luna, càlighe. Ispiga, ou, paoneddos. E framas. Ca su tessìngiu est arte, fine e passentziosa, de tramandare finas a cando b’at a àere manos, finas a s’ùrtimu àlidu de bentu.